Ionad Fiosrachaidh

’S e Seallam! am prìomh ionad-tadhail ann an Eilean na Hearadh agus tha taisbeanaidhean ann airson gach duine, le taisbeanadh maireannach airson daoine a tha a’ tadhal airson a’ chiad uair, agus taisbeanaidhean ùra airson an iomadach duine a tha air a bhith ann mar tha. Aig amannan den bhliadhna bidh taisbeanaidhean ann airson ùine ghoirid.

Chaidh an t-Ionad fhosgladh anns an Iuchar 2000 le Alasdair Moireasdan BPA agus Iain Dòmhnallach, Iain Dhòmhnaill Nèill, a rugadh anns An Taobh Tuath ach a bha a’fuireach anns a’ Ghearasdan aig an àm.

Faodaidh duine a dhol timcheall nan taisbeanaidhean a tha dèiligeadh ri nàdar agus eachdraidh nan Eilean Siar, no sealltainn ris an fhiosrachadh air teaghlaichean nan eileanan anns an Ionad Rannsachaidh.

Airson luchd-tadhail, tha cothrom an seo ionnsachadh mu dheidhinn chùisean a thug buaidh air leasachaidhean ann an coimhearsnachdan nan Eilean Siar, no airson daoine a tha ag iarraidh rannsachadh mionaideach a dhèanamh, tha gu leòr an seo dhaibh airson nan Eilean air fad.

Ged a b’ e uair a thìde no fad latha a bhiodh agad ri chaitheimh, tha gu leòr ann an Seallam! airson do shàsachadh.

Ma tha thu ag iarraidh tì no cofaidh, gheibh thu seo anns an ionad-bìdh aig Fàilteachas.

Tha Seallam! ann am baile An Taobh Tuath aig ceann a deas Na Hearadh. Tha e an teis mheadhan nan Eilean Siar, air an rathad gu Leòdhas, agus le aiseagan gu Uibhist agus Barraigh trì mìle air falbh anns an Ob.